Susuriin ng Malacañang ang 125-day accomplishment report ng Independent Commission for Infrastructure (ICI) kaugnay ng flood control scandal, ayon kay Palace Press Officer Undersecretary Claire Castro noong Lunes.
Ipinasa ng ICI ang report nito sa Office of the President (OP) noong Biyernes, na naglalahad ng kanilang mga nagawa mula nang magsimula ang operasyon noong Setyembre 2025.
Ayon sa komisyon, mula Setyembre 15, 2025 hanggang Enero 18, 2026, nakapagsumite sila ng siyam na referrals sa Office of the Ombudsman, na sumasaklaw sa 65 indibidwal.
Nakipag-coordinate din ang ICI para sa referral ng isa pang grupo ng 66 indibidwal sa Department of Justice para sa pag-issue ng immigration lookout bulletin orders.
Kabilang sa mga prominenteng personalidad na nirekomenda ng ICI na kasuhan dahil sa anomalya sa flood control projects ay sina dating Senador Bong Revilla Jr., Senators Joel Villanueva at Jinggoy Estrada, at dating Ako Bicol Representative Zaldy Co.
Nang tanungin kung nakipag-ugnayan na si Pangulong Ferdinand Marcos Jr. sa ICI tungkol sa report, sinabi ni Castro na wala pa siyang natatanggap na update maliban sa kumpirmasyon na naipasa na ito sa OES.
Noong Enero, sinabi ng Malacañang na hinihintay pa rin ni Marcos Jr. ang report, na kaayon ng kanyang pahayag na ang kapalaran ng komisyon ay malalaman pagkatapos nitong maipasa ang report.
Binigyang-diin ni Marcos na malapit nang matapos ang trabaho ng ICI, at natapos na nito ang pagsisiyasat sa mga proyektong flood management na may anomalya.
