Inaprubahan ng Department of Budget and Management (DBM) at Department of Education (DepEd) ang performance-based bonus (PBB) para sa mga kwalipikadong guro at non-teaching personnel para sa fiscal year 2023.
Batay sa DBM, pumasa ang DepEd sa pamantayan ng Inter-Agency Task Force on the Harmonization of National Government Performance Monitoring (AO25 Task Force) na may kabuuang 80 puntos, kaya kwalipikado ito para sa pinakamataas na PBB rate na katumbas ng 52% ng buwanang sahod.
Halimbawa, ang isang Teacher I na may buwanang sahod na ₱27,000 ay makatatanggap ng humigit-kumulang ₱14,040 bilang bonus.
Makikipag-ugnayan ang DBM sa DepEd para sa agarang pagpapalabas ng pondo sa pamamagitan ng Special Allotment Release Orders at Notices of Cash Allocation.
Ipapabatid naman sa mga regional at division offices ng DepEd kapag handa nang ipamahagi ang mga insentibo.
Ang hakbang na ito ay bahagi ng pagkilala ng pamahalaan sa kontribusyon ng mga guro at kawani ng edukasyon sa pagpapaunlad ng bansa.
