Wala nang buhay ang isang 4-anyos na batang lalaki na si Aki nang matagpuan sa kanyang kwarto sa Barangay Langkaan II, Dasmariñas, Cavite, kahapon ng madaling araw.
Ayon sa Dasmariñas Police Station, ang pangunahing suspek sa insidente ay ang kasintahan ng ina ng biktima.
Ang ina ng bata ay nagtatrabaho bilang domestic helper sa ibang bansa at mula pa noong 2023 ay iniwan ang pangangalaga ng kanyang anak sa kasintahan.
Base sa imbestigasyon gumising ang suspek ng alas tres ng madaling araw at natuklasang wala nang buhay ang bata.
Tinawag ng suspek ang tiyuhin ng biktima, na agad na nagkumpirma na patay na ang bata.
Kaagad naman na ini-report ng tiyuhin ang insidente sa mga awtoridad.
Sinabi ng tiyuhin ng biktima na bago pa mangyari ang insidente, may mga naunang ulat ng pananakit ang suspek sa bata.
Ayon dito, pinalo, binato ng matigas na bagay, at hinampas ang bata ng tatlong beses.
Nagtamo ang bata ng mga pasa sa ulo at iba pang bahagi ng katawan at may kagat ding natagpuan sa maselang bahagi nito.
Samantala, tumanggi ang suspek na magbigay ng pahayag at kasalukuyan itong nakakulong sa Dasmariñas Police Station Custodial Facility, nahaharap sa kasong murder.
