Nasawi ang isang pulis makaraang pagbabarilin ito sa Brgy. Libertad, Abulug, Cagayan.
Batay sa spot report ng Abulug PNP, naganap ang pananambang Lunes (November 7) pasado alas-8:00 ng gabi sa harap ng isang hardware shop sa naturang barangay.
Nakilala ang biktima na si Police Major Rafael Tangonan, residente ng Ballesteros, Cagayan.
Ayon sa PNP Abulug, nakatanggap sila ng tawag mula sa isang concerned citizen na may naganap na pamamaril sa nasabing lugar na agad naman nilang nirespondehan.
Nadatnan ng mga pulis ang duguang biktima sa loob ng kaniyang sasakyan na Toyota Hilux na may plate number ACA 2286 na may mga tama ng bala ng baril.
Sa inisyal na imbestigasyon ng pulisya, lulan umano sa Toyota Innova na kulay brown ang bumaril sa biktima gamit ang long firearms. Naglunsad naman ng manhunt operation ang mga otoridad habang nagpapatuloy ang imbestigasyon sa naturang pagpaslang sa pulis.
