TUGUEGARAO CITY-Nedeklara nga ipay ta state of calamity y ili na Allacapan Cagayan.
Ta interview na Bombo Radyo, kinagi ni Mayor Harry Florida nga matindi y epekto na badju nga Odette nga naddanum ta nakagi nga lugar.
Kinagi ni Florida nga ngammin nga 27 barangay na Allacapan ay nadanum.
Y fermi na yaw ay annam nga barangay y isolated anna ari paga matallung na Municipal Disaster Risk Reduction and Management Council megafu ta adde futak y danum na ta kalsada.
Tallu nga overflow bridges gapa ta nakagi nga ili y ari malakaran megafu ta napalammak na danum megafu ta nadaral yaw.
Kinagi ni Florida nga nasikan paga y danum nga maggafu ta nadaral nga irrigation canal ta Brgy. Dagupan.
Kinagi paga na Mayor nga 50 percent ta 9, 680 ektarya nga ammay nga aranni ngana nga mapi y nadanum.
Usan na gobyerno na Allacapan y P2 million calamity fund tapenu moffunan da y nafektan nga residente ira.
