TUGUEGARAO CITY- Naka-half mast y Flag ta Batanes tapenu ipamasingan da nga maddaddam ira ta appatay ni Congresswoman Hedelina Abad atawa na dati nga Budget Secretary Butch Abad.
Ta interview na Bombo Radyo Tuguegarao ta kofun na nga si Ritchie Rivera nga iyya gapa y Provincial Fishery Officer na Batanes, kinagi na nga aranni ta totolay si Abad.
Tadday nga hands on Congresswoman si Abad megafu ta pasyaran na ira y kada ili na Batanes tapenu masiguro nga makasta y ipay na nga proyekto anna programa para ta totolay ira.
Kinagi ni Rivera nga dakal y kawa na totolay ta appatay na kongresista nga tadday kannu nga passionate civil servant megafu ta nepasita na ira y angngaya anna dedikasyon ta serbisyu na ira ta Ivatans.
Namwan nga dekano na School of Government ta Ateneo de Manila si Abad liye nga nakkongresista turi 2010.
Natay iyya ta edad nga 62 turi Linggu megafu ta pancreatic cancer.
Na-cremate y baggi na kongtresista anna iyangay da y avu na ta Batanes ta Biernes mula ta balay da ta Quezon City.
Yaw ngana nakwan y naporyan nga termino ni Abad bilang kongresista na Batanes.
