Nanguna ang Cagayan Police Provincial Office (CPPO) sa isinagawang Unit Performance Evaluation Rating ng PNP Region 2 sa lahat ng tanggapan ng PNP Provincial Offices sa lambak ng Cagayan.
Ayon kay PCAPT Isabelita Gano, tagapagsalita ng CPPO, nakakuha ng 93.98 na rating ang PNP Cagayan dahil sa puspusang pagsisilbi at pagpapatupad ng mga panuntunan at proyektong nakakatulong sa kapakanan ng publiko.
Pumangalawa naman ang Isabela PPO na nakakuha ng 92.61 na sinundan ng Quirino na may 90.27, Santiago City na may 88.95 habang sa Batanes naman at 87.85.
Pinuri naman ni Gano ang magandang pamumuno ni PCOL Renell Sabaldica dahil napanatili nilang muli ang pagiging top 1 mula pa noong nakaraang taon.
Saad ni Gano, lalo pang pag-iibayuhin ng pulisya ang kanilang paglilingkod upang makapagbigay ng magandang programa, seguridad at kaayusan sa probinsya at sa mga mamamayan.
