Umaapela si Manila Archbishop Jose Cardinal Advincula sa mga mamamayan na ipagdasal ang mga lider ng bansa, sa gitna ng patuloy na bangayan ng kampo nina Pangulong Ferdinand Marcos, Jr., at Vice President Sara Duterte.
Ayon kay Cardinal Advincula, ang nangyayaring ‘political storm’ sa mga matataas na lider ng bansa ay magdudulot lamang ng pagkaubos ng enerhiya na dapat sana ay gamitin sa paglilingkod sa pangangailangan ng mga Pilipino.
Binigyang-diin rin ng cardinal na mahalagang may pagkakaisa ang mga lider lalo’t patuloy bumabangon ang mga Pilipino sa epekto ng magkakasunod na malalakas na bagyo.
Umaasa rin naman si Cardinal Advincula na magkaroon ng kababaang loob at kahandaang makinig upang magkasundo ang magkatunggaling panig.
