TUGUEGARAO CITY- Inalak ngin ya makakwa kan nakarnap nga taxi kan Manila kattu March 13, 2018 ya takay na kattu mataruk.
Nekkahi ya makakwa nga maria na kayat ipakahi ya nahan na nga mari iggina naggudu kattu masingan na kan GPS ka hinyan kanyaw Tuguegarao ya taxi na.
Yo negudwan na e kattu iyakkul ya atawa ya driver na nga inyan iggina kan ospital ta napalattugan kan karalong na.
Gafu tyaw e inalistwan na ya nappa-Tuguegarao kavulun ya ama na entre ya mekaniko da.
Nasingannan na ya taxi na kan PNP nga awan ya karwan nga pyesa nan.
Kanyo pangivovug na kanyo misis ya driver na e nekahi na nga inyan kanu dwa nga nattakay nga lalaki kan taxi nga manevwan na nga nappatulud kan Muntinlupa.
Ngem kattu nakakadde da kanua kan Muntinlupa e ginalutan kanu ne dwa nga lalaki ya ima ne driver nga neange da kan bakante nga lusak.
Pinasiddag da kanu ne driver tapus pinalattugan da.
Piya laman ta nagunggun ya ima ne namalattug yan ta mari na nga napuruhan.
Nekkahi pay i Police Supt. Edward Guzman,hepe ya PNP Tuguegarao nga nasianganan ya pulis ira nga daggun nga kaywan ya suspek ira nga da i Redzumar Rioca nga taga Tuguegarao entre ya paryentes na nga i Jestono Rioca ya taxi kattu gabi kan Brngy.Pengue.
Alistu ya PNP nga minang kattu nekkahi ya PNP Santaigo, Isabela yaw nga suspek ira.
