Inirekomenda ng Commission on Audit ang mas mahigpit na mga hakbang, kabilang ang pagpigil sa sahod at pagpapataw ng penalties laban sa mga opisyal ng Department of Education (DepEd) na nabigo na magsagawa ng liquidation ng cash advances na nagkakahalaga ng P6.96 billion buhat noong December 31, 2023
Sa 2023 Annual Audit Report, pinuna ng COA ang kabiguan ng DepEd na istriktong sumunod sa law and regulations, na nagresulta sa pagkakaipon ng unliquidated cash advances.
Kabilang sa mahahalagang deficiencies ay ang pagkakaloob ng cash advances na walang proper authority, paglilipat ng mga pondo sa pagitan ng mga accountable offricers (AOs), kabiguan na maayos ang pondo para sa AOs, at pagbabayad ng gastusin tulad ng Service Recognition Incentives (SRI) sa pamamagitan ng cash advances sa halip na direct payment.
Base sa report, ang mga sumusunod na rehion ang nakapagtala ng pinakamataas na unliquidated balances:
Region VII (Central Visayas) : 1.31 billion
Region VIII (Eastern Visayas): 1.01 billion
Region XII (SOCCSKSARGEN): 819.4 million
Region IX (Zamboanga Peninsula): 537.1 million
Region VI (Western Visayas) : 513.9 million
NCR (National Capital Region): 301.9 million
Upang matugunan ang nasabing usapin, inirekomenda ng COA ang pagtigil na ng pagbibigay ng cash advances sa mga opisyal na may nakabinbin na balances, maglabas ng demand letters sa mga aktibong mga kawani upang magsagawa ng liquidation, pigilin ang sahod at dues ng mga deliquent Aos hanggang sa mabayaran nila ang kanilang mga obligasyon, magpataw ng penalties sa ilalim ng mga patakaran ng Civil Service Commission, at tanggalin na ang dormant accounts na hindi nareresolba sa loob ng isang dekada.
Tinukoy din sa report na sa ibang kaso, ilang outstanding balances ay sangkot ang accountable officers na nagretiro na, nag-resign, nag-AWOL, o nailipat, na lalong nagpapahirap sa recovery process.
