
Pinaigting ng Department of Agriculture (DA) ang pagbabakuna laban sa African Swine Fever (ASF) matapos makapagturok ng halos 500,000 doses sa mga baboy, habang 65 porsiyento ng mga lugar na naapektuhan ng sakit ay nakarekober na.
Ayon kay Agriculture Secretary Francisco Tiu Laurel Jr., layunin nitong maibalik ang lokal na produksyon ng baboy sa antas bago tumama ang ASF noong 2019, na umabot sa tinatayang 13 milyon.
Iniulat ng Bureau of Animal Industry na 499,008 doses ng bakuna ang nagamit mula 2024 hanggang unang kalahati ng 2026 sa pitong probinsiya.
Naglaan din ang DA ng ₱49.824 milyon na tulong pinansyal sa mga apektadong magbababoy sa walong rehiyon at pinalalakas ang mga hakbang sa biosecurity.
Gayunman, nananatili ang aktibong kaso ng ASF sa 236 barangay sa 23 probinsiya, habang 716 na lugar ang nakatalaga bilang buffer zones.










