Kakailanganin ng Department of Education (DepEd) ng 14 taon upang mapunan ang lahat ng bakanteng posisyon para sa guidance counselors sa mga paaralan dahil sa limitadong bilang ng mga nagtatapos mula sa master’s degree programs sa guidance at counseling bawat taon.
Ayon kay Karol Mark Yee, executive director ng Second Congressional Commission on Education, halos 300 lamang ang mga nagtatapos taun-taon mula sa mga paaralan na mayroong kinakailangang master’s degree program.
Sa kasalukuyan, mayroong 4,460 bakanteng posisyon para sa guidance counselors na hindi pa napupunan ng DepEd hanggang Marso 2024.
Ibinahagi ni Yee ang datos na ito sa isang press conference upang ipakita na ang kakulangan ng mga guidance counselors sa bansa ay dapat tugunan hindi lamang ng DepEd, kundi pati na rin ng iba pang ahensya ng edukasyon tulad ng Commission on Higher Education.
Ayon kay Yee, kinakailangang tugunan ng gobyerno ang problema sa pagkuha ng mga guidance counselors dahil sila ang mga nagbibigay ng suporta sa mental health ng mga estudyante sa ilalim ng Republic Act 10627 o ang Anti-Bullying Act of 2013.
