Nagkaloob ng libreng internet at komunikasyon ang Department of Information and Communications Technology (DICT) Kalinga para sa Provincial Disaster Risk Reduction and Management Office (PDRRMO) Kalinga sa kasagsagan ng pananalasa ng mga Bagyong Nika, Ofel, at Pepito.
Layunin ng inisyatibang ito na tiyakin ang tuloy-tuloy na koneksyon sa mga liblib na lugar ng lalawigan upang mapabilis ang koordinasyon at pagtugon ng mga disaster response team.
Nagbigay-daan din ang satellite internet upang makapaghatid ng mga babala, makatanggap ng mahahalagang impormasyon, at makipag-ugnayan sa mga pambansang ahensya.
Sa pamamagitan nito, nabawasan ang epekto ng kalamidad sa mga apektadong komunidad.
Ang kolaborasyon sa pagitan ng DICT Kalinga at PDRRM Kalinga ay isang patunay sa halaga ng makabagong teknolohiya, tulad ng satellite internet, sa disaster preparedness at response.
Ipinakita ng proyektong ito kung paano nagagamit ang inobasyon upang masiguro ang kaligtasan ng mga mamamayan kahit sa panahon ng malawakang pagkasira ng komunikasyon.
Sa pamamagitan ng ganitong hakbang, naging mas handa at matatag ang Kalinga sa harap ng mga hamon ng kalikasan.
