Naitala ng Department of Health (DOH) ang kabuuang 7,598 kaso ng hand, foot, and mouth disease (HFMD) sa buong bansa mula Enero 1 hanggang Pebrero 22 ng taong ito.
Ayon sa DOH, tatlong beses na mas mataas ito kaysa sa 2,665 na kaso na na-monitor noong 2024, ngunit mas mababa kumpara sa mahigit 2,500 kaso kada linggo na naitala noong Pebrero 2023.
Sa kabuuang bilang ng mga kaso, 4,225 dito ay mga bata na may edad 4 pababa, habang 2,069 na kaso ay mula sa mga bata na may edad 5 hanggang 9.
Ipinaliwanag ng DOH na ang HFMD ay isang nakahahawang sakit na naipapasa sa pamamagitan ng laway at maaaring makuha “kapag ang isang tao ay hinawakan ang mata, ilong, o bibig gamit ang kamay na nahawakan ang bagay na kontaminado ng virus.”
Karamihan sa mga kaso ng HFMD ay magaan lamang, ngunit nagbigay babala ang DOH na ang mga sintomas nito ay kinabibilangan ng lagnat, ubo, pantal, sugat sa bibig, at mga blisters sa mga kamay, paa, at pwet. Maari din itong magdulot ng mas seryosong komplikasyon tulad ng meningitis at encephalitis o pamamaga ng utak.
Upang maiwasan ang pagkalat ng virus, pinayuhan ng DOH ang publiko na maghugas ng kamay ng 20 segundo gamit ang sabon at iwasan ang malapit na kontak sa mga taong may sakit.
