TUGUEGARAO CITY-Dead on Arrival sa pagamutan ang isang doktor matapos maibangga ang kanyang minamanehong sasakyan sa nakaparadang trailer truck sa bayan ng Iguig, Cagayan.
Ayon kay Police Staff Sergeant Fernan Borak, imbestigador ng kaso, pauwi na ang biktima na si Dr. Noli Abad Cabildo, 29-anyos ng Brgy. Aganni sa bayan ng Alcala sa kanilang tahanan mula sa kanyang trabaho sa probinsya ng Isabela nang mangyari ang aksidente.
Aniya, posibleng hindi napansin ng doktor ang trailer truck kung kaya’t dumeretyo ito sa likurang bahagi ng truck.
Dahil sa lakas ng impak ng pagkabangga ay nawasak ang harapang bahagi ng sasakyan na sanhi ng pagkakaipit ng biktima.
Maging ang mga barrier sa gilid ng kalsada ay bahagya ring nasira nang subukang iwasan ng biktima ang trailer truck.
Agad dinala sa pagamutan ang biktima ngunit idineklarang dead-on arrival ng mga umasikasong duktor dahil sa mga tinamong sugat sa katawan.
Sa ngayon, nasa kustodiya na ng kapulisan ang driver ng trailer truck na si Fernando Urian ng Brgy. Iringan, Allacapan habang kasalukuyan ang pag-uusap ng magkabilang panig.
