TUGUEGARAO CITY – Ari maaksepta na familya na Pinay OFW nga natay ta lunik ta Hualien, Taiwan y nepay sa.
Kinagi ni Mary Jane Albano-Abig, tiyahin ni Melody Albano Castro na Brgy Banguian, Abulug nga iyya laman y ekspektan na familya na.
Kinagi ni Abig nga ari gare makatrabahu y mister na megafu ta naaksidente yatun ta y pinay care giver y mannolay ta familya na.
Madaddam y magana na turi mamwan da y balita ta Bombo Radyo anna kinumfirma na presidente na Filipino community ta Taiwan nga natay ngana yaw.
Si Melody, 29-anyos, mekadwa ta duwa nga mawwagi,tallu ragun nga masservi nga care giver ta Taiwan nu anni naulila na yaw y annam nga ragun nga ana na.
Naporyan nga nakergo na y familya na ay turi Feb.6.
Sangaw ay makiddaw ta uffun ta gobierno y familya ni De Castro para ta insigida nga allabe na baggi na.
