Binanggit ni Senador Sherwin Gatchalian na ang posibleng pagdedeklara ng national state of emergency sa gitna ng tuloy-tuloy na pagtaas ng presyo ng langis ay dapat nakabatay sa masusing pagmamanman ng galaw ng presyo ng mga pangunahing bilihin.
Aniya, halos tatlong linggo nang tumaas ang presyo ng langis, na maaaring magdulot ng chain reaction sa ekonomiya—mula sa pagtaas ng presyo ng pagkain hanggang sa epekto sa sahod at kabuhayan ng mga manggagawa.
Paliwanag ni Gatchalian, hindi dapat padalos-dalos ang desisyon sa pagdedeklara ng state of emergency.
Kailangan munang maunawaan ang lawak at lalim ng epekto ng pagtaas ng presyo upang matiyak na ang hakbang ng pamahalaan ay nakatutugon sa tunay na pangangailangan ng publiko.
Iginiit ng senador na ang tuloy-tuloy at maingat na pagsubaybay sa merkado ang susi para sa mabilis at tamang pagtugon sa anumang krisis sa ekonomiya.
Ayon kay Gatchalian, ang pagkakaroon ng sapat na datos at analysis ay kritikal upang matiyak na anumang hakbang sa estado ng emerhensiya ay epektibo at makakabuti sa nakararami.
