Sa unang pagdinig ng impeachment case laban kay Vice President Sara Duterte nitong Miyerkules, naglabas ng iba’t ibang subpoena ang House Justice Committee at hiniling ang pagdalo ng ilang personalidad at pagsusumite ng mga dokumento kaugnay ng imbestigasyon.
Kabilang sa mga ipinatawag ng komite si Ramil Madriaga, dating aide ni Duterte na nagsabing nakipag-ugnayan siya sa mga security officer ng Bise Presidente sa pag-deliver ng mga confidential funds sa iba’t ibang indibidwal; si Cynthia Viñas-Pantonal, abogado na nag-notaryo sa affidavit ni Madriaga; si Gloria Camora ng Commission on Audit na tumingin sa confidential expenditures; at si Michael Poa, dating undersecretary ng Department of Education at tagapagsalita ng Office of the Vice President.
Hiniling din ng komite ang karagdagang proteksyon para kay Madriaga, na nagsabing nanganganib ang kanyang buhay habang nakakulong sa Camp Bagong Diwa.
Naglabas din ang komite ng mga kahilingan sa iba’t ibang ahensya. Sa Office of the Ombudsman, hiniling ang Statement of Assets, Liabilities and Net Worth ni Duterte mula 2007 hanggang 2013, 2016 hanggang 2019, at 2022 hanggang 2025. Sa National Bureau of Investigation, hiniling ang mga record ng imbestigasyon kaugnay ng umano’y banta ni Duterte laban kay Pangulong Ferdinand Marcos Jr. at sa kanyang pamilya. Sa Commission on Audit, hiniling ang mga dokumento ng confidential funds.
Sa iba pang ahensya, hiniling din ang mga tala mula sa Philippine Statistics Authority, Bureau of Internal Revenue, Securities and Exchange Commission, at House legislative archives kaugnay ng iba’t ibang dokumento at transaksyon.
Karamihan sa mga mosyon ay inaprubahan, maliban sa pagtutol ni Cagayan de Oro 2nd District Representative Rufus Rodriguez, na nagsabing isa itong fishing expedition at lumalampas sa tungkulin ng Bise Presidente. Tinawag din niyang polluted source si Madriaga, ngunit inalis ito sa talaan matapos ang mosyon ni Senior Deputy Minority Leader Leila de Lima.
Mahigit dalawang oras din na tinalakay ng komite ang mga panuntunan bago umusad ang pagdinig.
Gaya ng inaasahan, hindi dumalo si Vice President Duterte sa pagdinig. Sa liham ng kanyang mga abogado, iginiit na walang hurisdiksyon ang komite na magsagawa ng anumang uri ng trial at kinuwestyon ang pagdinig.
Ikinadismaya naman ni De Lima ang hindi pagdalo ni Duterte, at sinabing tila hindi nito nirerespeto ang proseso ng komite.
Kabilang sa mga reklamo laban sa Bise Presidente ang umano’y maling paggamit ng confidential funds, bribery, graft and corruption, betrayal of public trust, at iba pang mabibigat na akusasyon, kabilang ang umano’y pagbabanta sa buhay ng Pangulo at kanyang pamilya.
May 60 session days ang House mula Pebrero 23 upang resolbahin ang mga reklamo. Kapag naaprubahan ang ulat ng komite sa plenaryo sa pamamagitan ng isang-katlong boto, isusulong ang kaso sa Senado para sa paglilitis. Tanging hatol ng Senado ang maaaring magpatalsik at mag-disqualify kay Duterte sa puwesto.
