Inihayag ni House Speaker Faustino “Bojie” Dy III na agad na pagtutuunan ng House of Representatives ang mga panukalang inihayag ni Pangulong Ferdinand Marcos Jr. sa kanyang ikalimang State of the Nation Address (SONA), kabilang ang pagpapalawak ng income tax exemption para sa mga manggagawang kumikita ng hanggang P350,000 kada taon, pagbabawas ng income tax ng iba pang empleyado, at pagbibigay ng tax amnesty sa mga kwalipikadong nagbabayad ng buwis.
Ayon kay Dy, susuportahan din ng Kamara ang mga panukalang magpapababa sa singil sa kuryente, kabilang ang Sariling Kuryente Act na magpapalawak sa paggamit ng rooftop solar panels at battery storage systems, gayundin ang pag-amyenda sa Electric Power Industry Reform Act (EPIRA) upang alisin ang system loss charge at kaukulang value-added tax (VAT) na ipinapasa sa mga consumer.
Samantala, sinabi ni House Committee on Ways and Means Chairperson at Marikina City Rep. Miro Quimbo na maaaring mabawi ang tinatayang **P50 bilyong mawawalang kita ng pamahalaan mula sa panukalang tax relief sa pamamagitan ng mas mataas na buwis sa vape, tobacco, sugar-sweetened beverages at single-use plastics upang matiyak na hindi maaapektuhan ang pondo para sa mga serbisyong pampubliko.
