Sugatan ang ilang miyembro ng crew at ground staff matapos biglang bumigay ang unahang landing gear o nose gear ng isang Boeing 787 ng Lufthansa habang nakaparada ito sa gate ng Frankfurt Airport nitong Huwebes.
Ayon sa Lufthansa, wala pang pasaherong nakasakay nang mangyari ang insidente.
Gayunman, may mga crew member at ground personnel na nasa loob ng eroplano at ilan sa kanila ang nagtamo ng pinsala at kasalukuyang ginagamot.
Naganap ang insidente dakong alas-12:45 ng tanghali.
Nakatakda sanang bumiyahe ang eroplano patungong Los Angeles bilang Flight LH450.
Nakitaan ng mga emergency vehicle ang paligid ng aircraft na bahagyang sumayad ang katawan sa lupa matapos bumigay ang landing gear.
Sinabi ng Lufthansa na nakikipagtulungan na sila sa mga awtoridad upang matukoy ang eksaktong sanhi ng insidente.
Ang Boeing 787-9 ay kabilang sa mga mas bagong eroplano sa fleet ng Lufthansa na ginagamit sa modernisasyon at pagpapalit ng mas lumang mga sasakyang panghimpapawid.
