Inihayag ng Iran na malapit na nitong maabot ang kasunduan sa Oman para sa bagong shipping route sa Strait of Hormuz, ngunit hindi pa ito sapat para agad na muling buksan nang normal ang mahalagang daluyan ng langis at gas.
Ayon kay Iranian Foreign Minister Abbas Araqchi, nakikipag-ugnayan ang Iran at Oman sa isang pansamantalang ruta habang inaayos ang mga teknikal at legal na usapin para sa permanenteng arrangement.
Gayunman, sinabi ng Iran na kailangan pa nitong matugunan ang ilang kondisyon, kabilang ang pagtigil sa mga banta at pag-atake ng Estados Unidos, pagtanggal ng sanctions at blockade, at pagbabalik ng mga nakapirmang Iranian assets.
Samantala, iniulat ng United Arab Emirates na isang barkong konektado sa state oil company nito ang tinamaan ng missile habang dumadaan sa Strait of Hormuz. Wala namang naiulat na nasugatan.
Ayon naman sa UK Maritime Trade Operations, isang barko ang nasunog matapos tamaan ng hindi pa nakikilalang projectile, ngunit naapula ang apoy at walang naiulat na environmental damage.
Bago ang giyera, tinatayang nasa ikalimang bahagi ng pandaigdigang oil at gas shipments ang dumaraan sa Strait of Hormuz. Ang patuloy na tensiyon sa lugar ay nagdulot ng pagkaantala sa global shipments at pagtaas ng presyo ng enerhiya.
