Inihayag ng isang mataas na opisyal ng Iran na ititigil ng Tehran ang mga pag-atake nito hangga’t hindi ipinagpapatuloy ng Estados Unidos ang airstrike laban sa bansa, matapos ipatigil ni U.S. President Donald Trump ang halos dalawang linggong kampanya ng pambobomba.
Ayon sa opisyal, nananatili ang posisyon ng Iran na gaganti lamang ito kung muling aatake ang Estados Unidos. Aniya, naiparating na rin ng Iran ang naturang mensahe sa Washington, ngunit handa itong maglunsad ng mas malawak na tugon sakaling ipagpatuloy ng Amerika ang mga pag-atake.
Sinabi naman ni United States Ambassador to the United Nations Mike Waltz na pansamantalang itinigil ni Pangulong Trump ang airstrike upang bigyang-daan ang diplomasya at mga posibleng pag-uusap. Gayunman, sinabi ng Iranian official na nananatiling nagdududa ang Tehran sa intensyon ng Washington at naniniwalang maaaring taktikal lamang ang paghinto ng operasyon.
Nagsimula ang kampanya ng airstrike ng Estados Unidos bilang tugon sa mga pag-atake ng Iran sa mga barkong dumaraan sa Strait of Hormuz. Sa gitna ng pansamantalang paghinto ng opensiba, nananatiling mataas ang tensyon sa rehiyon, habang patuloy na binabantayan ng iba’t ibang bansa ang posibleng muling paglala ng sigalot.
