Viral ngayon ang isang aspin na si “Puti,” na nakasuot ng ID na parang mga empleyado sa isang hardware store sa Montalban, Rizal.
Ayon sa mga empleyado, mabait si Puti at hindi ito nangangagat, pati na rin sa mga customer.
Dati, isang marungis na asong gala lang si Puti na palaging tumatambay sa labas ng hardware store.
Nang makita siya ni Edgardo Bosito, isa sa mga empleyado, noong 2023, nagsimula na siyang pakainin.
Hindi nagtagal, naging regular si Puti sa loob ng store, at kalaunan, nagdesisyon ang isang supervisor na bigyan siya ng ID bilang “opisyal” na aso ng hardware store noong Nobyembre 2024.
Dahil sa pag-aalaga ng mga empleyado, nabigyan si Puti ng maayos na higaan, pagkain, at regular na pagpapaligo.
Ayon sa supervisor, bakunado at hindi nangangagat si Puti kaya’t wala namang alalahanin ang mga empleyado at customers sa kanyang presensya.
Ang pagiging “empleyado” ni Puti ay nagdudulot ng saya sa buong shop at pati na rin sa mga customer.
