Umani ng mga paghanga ang isang security guard ng Tuguegarao City Airport na si Gerard Dumrique na tubong Sto.Nino, Cagayan dahil sa kanyang katapatan.
Ito’y matapos niyang ibinalik ang naiwang bag sa waiting area na naglalaman ng pera na nagkakahalaga ng P24,000, alahas at mahahalagang dokumento.
Sa panayam ng Bombo Radyo, sinabi ni Dumrique na bahagi ng paggampan ng kanyang trabaho ay ang pagiging matapat at hindi siya naghihintay ng kapalit.
Ayon kay Dumrique, halos 30 minuto na umanong naiwan ang nasabing bag kung kayat inusisa niya ito sa pamamagitan ng pagtatanong sa mga tao na nasa waiting area ng paliparan kung kanino ang bag subalit wala namang nakakaalam.
Dahil dito, agad niyang ipinasakamay sa PNP na nakatalaga sa paliparan para sa proper handling sa mga kahina-hinalang naiiwang kargamento o bag sa paliparan na kung saan natukalasan na hindi naman ito mapanganib.
Nabatid na pag mamay-ari ng isang kidney patient na galing sa Metro Manila na nakilalang si Jenny Cauilan ng Barangay Sampaguita, Solana, Cagayan ang naturang bag.
Naiwan umano ang bag dahil sa nagmamadali siyang umuwi.
Pinuri naman siya ng mga netizen na nagsabing sana ay maging huwaran o kaya’y tularan siya ng kanyang mga kapwa frontliners.
Pinuri rin ng kanyang detachment commander na si Mark Egipto ang katapatan ni Dumbrique kaya’t magsusumite umano siya ng incident report upang mabigyan ng pagpupugay at karangalan si Dumrique sa punong tanggapan ng kanilang security agency.
Hinangaan din si Dumrique ng pamunuan ng Civil Aviation of the Philippines o CAAP Tuguegarao na si Manager Mary Sulyn Sagorsor ang kaniyang katapatan.
Kuwento aniya ng may ari na dahil umano sa pagmamadali nitong umuwi ay nakalimutan niya ang kanyang bag.
