TUGUEGARAO CITY-Nala na CCTV y kagaru na bag na tadday nga babay nga lumakak ta syudad na Tuguegarao.
Ta alak na CCTV, masita nga makadaldalan y biktima nga si Jovelyn Hovellaños, 21-anyos ta kanto na Blumentrit St.
Gavva iyya nga tinunuk na tallu nga lalli nga nakatakay ta tadday nga motorsiklo anna ginaru na tadday nga nakatakay ta motor y shoulder bag na biktima.
Kinagi na biktima nga malabbe nakwan iyya turi nanoli ta nakalippanan na y mangilawan tu kuwartu na.
Mappange pagalaman iyya ta bangko turi garutan da y bag na.
Y nadjan na bag ay uniporme, ATM anna pitaka na biktima nga awan tu kuwartu na.
Maski nala na CCTV y insidente, ay marigatan nga mamwan nu sinni ira y suspek kunne gapa y plaka na motorsiklo nga neusa da.
Olu taw ay tadday nga maginganay y ginaru da y cellphone na ta Arellano St. Brgy Cento 2,Tuguegarao City.
