Itinanggi ng kampo ni Vice President Sara Duterte ang lahat ng apat na artikulo ng impeachment na isinampa laban sa kanya, at iginiit na walang sapat na ebidensya upang patunayan ang mga paratang.
Sa isinumiteng sagot ng depensa, sinabi nitong protektado ng karapatan sa malayang pamamahayag ang mga naging pahayag ng Bise Presidente at wala umanong patunay na may plano siyang ipapatay sina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Pinabulaanan din ng kampo ni Duterte ang alegasyon ng maling paggamit ng mahigit P600 milyong confidential funds, at iginiit na walang ebidensyang nagpapakitang napunta ang pondo sa personal na kapakinabangan ng Bise Presidente.
Tinutulan din ng depensa ang paggamit ng mga ulat ng Anti-Money Laundering Council at iba pang bank records bilang ebidensya, dahil umano sa pagiging kumpidensyal ng mga ito sa ilalim ng umiiral na batas.
Samantala, hiniling ng kampo ni Duterte sa impeachment court na ibasura ang mga artikulo ng impeachment dahil umano sa kabiguang matugunan ang mga itinakdang rekisito ng Konstitusyon para sa isang impeachment proceeding.
