Patay ang isang 54-anyos na lalaki matapos siyang barilin ng isa pang driver na kaniyang nakagitgitan sa Dasmariñas, Cavite.
Makikita sa CCTV footage ang pagdaan ng dalawang sasakyan sa Abad Santos Avenue sa Barangay Salitran III umaga ng Miyerkules.
Parehong tumigil ang mga sasakyan bago binuksan ng driver ng pulang kotse ang bintana nito at sabay ulit silang mabagal na umandar.
Tila nagkaroon ng diskusyon ang dalawang driver.
Ilang saglit lang, may tila itinutok ang driver ng pulang kotse sa driver ng puting pickup bago humarurot.
Kinilala ang driver ng puting pickup na si Mayo Junel Santos, kawani ng Meralco, na naiwan sa pickup.
Sa isa namang kuha ng isang saksi, makikitang duguan na si Santos, na pinagbabaril pala ng driver ng pulang kotse.
Dinala sa ospital ang biktima pero hindi na siya umabot nang buhay.
Lumabas sa imbestigasyon ng pulisya na away-trapiko ang nakikita nilang motibo sa pamamaril.
Nagsasagawa ng backtracking at follow-up operation ang mga awtoridad sa ikadadakip ng gunman.
Nakipag-ugnayan na rin sila sa Land Transportation Office o LTO para matukoy ang pulang kotse na ginamit sa krimen.
