TUGUEGARAO CITY-Kritikal sa pagamutan ang isang lalaki nang tangkain nitong barilin ang isang pulis na sumita sakanya sa checkpoint area sa lungsod ng Tuguegarao .
Una rito, tumawag ang PNP-Cabagan sa PNP-Tuguegarao at ipinagbigay alam ang isang motorsiklo na lulan ang suspek na Yves emmanual, 24-anyos na papasok sa probinsiya na isang kahina-hinalang indibidwal.
Galing sa hindi pa mabatid na lugar ang suspek na napadaan din sa checkpoint area sa Cabagan at San Pablo, Isabela ngunit hindi tumigil kung kaya’t ipinagbigay alam sa PNP-Tuguegarao.
Pagdating sa Barangay Namabbalan Sur kung saan nakalatag ang checkpoint ay sinubukang patigilan ng kapulisan ang suspek ngunit pinaharurut lamang nito ang kanyang motor na sanhi ng pagkaladkad sa isang pulis na nakahawak sa manibela ng motorsiklo.
Nang makita ng suspek na natumba at sugatan na ang pulis ay sinubukan nitong hugutin ang kanyang 38 revolver na baril at tinangkang barilin ang pulis ngunit inunahan ito ng isang sundalo na si Corporal Roel Maribbay na kasama rin sa nagbabantay sa checkpoint area.
Nagtamo ng tama ng baril ang suspek sa kanyang tagiliran na ngayon ay ginagamot na sa Cagayan Valley Medical Center habang galos naman ang tinamo ng isang pulis dahil sa pagkaladkad sakanya ng suspek.
Nakuha sa suspek ang dried marijuana na nabalot sa papel, isang improvised tooter, 38 revolver, cellphone at ang ginamit na motorsiklo.
Sa ngayon, patuloy ang isinasagawang imbestigasyon ng pulisya kung saan nanggaling at kung saan papunta dito sa probinsiya ng cagayan ang suspek.
