TUGUEGARAO CITY-Igga ta kritikal nga kundisyon ta ospital y tadday nga lalaki nga nappattu ta mekappa nga palu ta tadday nga mall ta Tuguegarao City turi umma.
Kinilala na PNP y biktima nga si John Christopher Teodoro,29.
Olu taw kinagi ni Jason Arago, market inspector nga nasita na y lalaki nga nunet ta 4th floor na mall anna alle indandaya na nga mappatu yaw yatun ta nefuwak na.
Kinagi na kinajanan na y lalaki nga ayatan na y attolay na habang igga ta dalan nga itulug na ta Brngy. Centro 10.
Ngamme ari iyya kanu ngana nasita ni Arago nga nanoli gabba y lalaki anna nunet manin ta 4th floor na mall.
Nakiltu laman iyya turi maggugulu y tolay ira megafu ta nataga nga tolay ta gukak na mall nga si Teodoro.
Namittallu kanu nga pinurban na biktima nga mappattu ta nakagi nga mall ngamme kanayun na kanu nga mafuwaggan.
Kinagi na nga alle igga y diperensiya na y lalaki megafu ta “mommy” laman y mavuya na.
Kinagi naman na yena na lalaki ta PNP,igga delusional disorder kanu na ana anna maddaggun y medication na.
Y delusional disorder ay simtomas na psychosis nga makagi nga abnormal nga kundisyon ta nono na.
