Sinabi ng Department of Energy na ang pagpayag ng Iran sa ligtas na pagdaan ng mga kargamentong enerhiya ng Pilipinas sa Strait of Hormuz ay bahagi ng risk management ng gobyerno at hindi agad magpapababa ng presyo ng langis.
Ayon kay Energy Secretary Sharon Garin, makakatulong ito upang mabawasan ang panganib sa suplay ng langis, maprotektahan ang mga kargamentong may kaugnayan sa Pilipinas, at mapabuti ang kaligtasan ng mga Pilipinong seafarer sa gitna ng tensyon sa pagitan ng US, Israel, at Iran.
Nilinaw ng DOE na hindi nito agad maaapektuhan ang presyo ng langis at hindi rin nito nasosolusyunan ang pangmatagalang problema sa sektor ng enerhiya.
Ang Strait of Hormuz ay dinadaanan ng humigit-kumulang 20% ng pandaigdigang suplay ng langis at liquefied natural gas. Nakuha ng Pilipinas ang kasunduang ito matapos ang pag-uusap ng Department of Foreign Affairs at Iran.
Samantala, batay sa galaw ng presyo sa pandaigdigang merkado, inaasahang tataas ang presyo ng diesel ng P17 hanggang P19 kada litro sa susunod na linggo, habang ang gasolina ay posibleng tumaas ng P3 hanggang P5 kada litro.
Sa pinakahuling datos, umabot na sa kabuuang pagtaas ngayong taon ang P48.20 kada litro para sa gasolina, P90.05 para sa diesel, at P78.10 para sa kerosene.
