Inanunsyo ng Department of Information and Communications Technology na inilunsad na rin ang Transparency Portals ng PhilHealth at Social Security System, kasunod ng naunang pagbubukas ng DPWH Transparency Portal na pinangunahan ni Pangulong Ferdinand Marcos Jr.
Ayon kay DICT Secretary Henry Aguda, ang mga bagong portal ay bahagi ng mas malawak na hakbang ng administrasyon na gamitin ang teknolohiya para labanan ang korupsyon, gawing mas episyente ang serbisyo ng gobyerno, at ibalik ang tiwala ng publiko.
Layunin ng mga portal na gawing mas bukas at madaling makita ng publiko ang impormasyon tungkol sa budget at paggastos ng mga ahensya.
Gamit ang artificial intelligence, kayang magbigay ng malinaw na paliwanag ang system tungkol sa anumang government spending, pati na rin sumagot sa mga tanong sa English, Filipino, o Taglish.
May kasama rin itong visual dashboards, charts, at infographics na madaling tingnan kahit gamit ang ordinaryong smartphone.
Paliwanag ng DICT, ang DPWH, PhilHealth, at SSS ang kauna-unahang naglabas ng transparency portals, ngunit sunod-sunod pang ilalabas ng iba pang ahensya ang kani-kanilang bersyon sa mga susunod na linggo.
Target ng pamahalaan na gawing standard ang pagkakaroon ng transparency portals sa lahat ng ahensya bago matapos ang taon.
Maaaring ma-access ang mga portal sa websites ng DPWH, SSS, PhilHealth, at sa open.gov.ph.
Ayon sa DICT, sa pamamagitan ng mga portal, mas magiging mahirap itago ang anomalya, mas madali para sa publiko ang mag-monitor ng pondo, at mas transparent ang magiging galaw ng pamahalaan.
