TUGUEGARAO CITY – Natay habang maddaggun nga maurwan ta ospaital y tadday nga construction worker ta pamalattuk na riding in tandem suspects taw ta syudad na Tuguegarao, turi aggaw.
Y natay ay si Diosdado Arugay Jr. habang nabigaran gapa y kapitta na nga si Marcelino Sepnio, parehu nga residente taw ta Syudad.
Ta interview kanni PSI Alexander Tamang na PNP Tuguegarao, makkaergo y duwa nga biktima ta arubang na tadday nga vulcanizing shop ta Brgy Ugac Sur turi gavva nga ninay tari y duwa nga suspek nga nakatakay ta motorsiklo.
Taw nakkadda y back rider anna pinalapalattugan na si Arugay anna nattakas ta kabalin na krimen.
Annam y tama na cal. 45 kanni Arugay habang daplis laman kanu y nekanna ta kapitta na nga mappamapiya ngana ta ospital.
Ari ammu na otoridad y motibo ta pamalattuk nu anni ay awan gapa tu nagan na duwa ta drug list na PNP.
Matageno na turi nabalin nga liggu ay pinalattugan natay gapa si Atty Neil Agustin, director na civil Service Commission- RO2.
