Matapos ang 14 na taon sa death row sa Indonesia, ipinagdiwang ni Mary Jane Veloso ang Pasko kasama ang kanyang pamilya kahapon.
Bumisita sa kanya sa Correctional Institution for Women (CIW) sa Mandaluyong City ang kanyang mga magulang, dalawang anak, at 21 iba pang kamag-anak.
Ibinahagi ng Migrante International ang isang litrato na kuha sa labas ng CIW compound, kung saan makikita ang mga kamag-anak ni Veloso.
Isa sa kanila ang may hawak na dilaw na parol na may larawan ni Veloso.
Ayon kay Joanna Concepcion, chairperson ng Migrante, nanatili ang pamilya ni Veloso hanggang hapon upang makasama siya.
Dahil nananatili si Veloso bilang isang bilanggo, pinayagan lamang silang magdala ng pagkain at hindi mga regalo.
Ipinagbawal din ang pagkuha ng mga litrato at video sa loob ng kulungan.
