TUGUEGARAO CITY-Natay y tadday nga grade 5 pupil ta kabalin nga malimo ta kayan ta ili na Enrile.
Y biktima ay si Jackelyn Macarubbo, 11-anyos anna residente na barangay Alibago Enrile.
Base kanni PO3 Abner Accad,imbestigador na kaso, ninay y biktima anna y kaka na nga si John Macarubbo 12-anyos kavulu da y tadday paga nga menor-de edad tapenu umay da mabbanwet ta ikan.
Habang maddaggun da nga mabbanwet naggayang y biktima anna y kavulu na ta aggik na kayan turi gavva nga nedaluya y biktima yatun ta natannak yaw.
Kinurak na kaka na y biktima ngamme ari na nakaya megafu ta sikan na agos na.
Namwan nga arrayu ta gibbalayan y nakakwan na insidente yatun ta ari insigida nga nakaakkul ta mangurak.
Fera taw base ta rekord na PNP Cagayan y biktima y mekalima nga nalimo sangaw nga vulan na Marso.
