Humihingi ng tulong mula sa national government ang mga Local government units (LGU’S) na naapektuhan ng pagsabog ng Mt.Kanlaon noong December 9, 2024, dahil nauubos na ang kanilang pondo para sa mga kalamidad.
Nagbigay ng alarma ang mga lokal na pamahalaan ng La Castellana sa Negros Occidental at Canlaon City sa Negros Oriental dahil sa pagkaubos ng kanilang quick response fund (QRF) para magbigay ng pagkain sa libu-libong apektadong residente.
Habang ang pamahalaang panlalawigan ng Negros Occidental ay nagsisikap na tumulong sa mga LGU, sinabi ni Gobernador Eugenio Jose Lacson na umaasa rin sila sa tulong ng national government, partikular na ang Department of Social Welfare and Development (DSWD), upang patuloy na magbigay ng mga food pack sa mga apektadong LGU.
Ayon sa Office of Civil Defense (OCD), umabot na sa 99 porsyento ang rate ng evacuation, na may 3,799 pamilya o 15,083 katao ang nailikas na mula sa 15 barangay ng La Castellana at mga lungsod ng Bago, La Carlota at Canlaon na nasa loob ng anim na kilometro ng PDZ.
Ang La Castellana ang pinakamalubhang naapektuhan na lokalidad, kung saan 1,134 pamilya o 5,670 katao ang apektado ng eruptions.
Iniulat ng pamahalaan ng Canlaon City na halos 97.9 porsyento ng kanilang mga residente ang nailikas na, na may 1,719 pamilya o 5,530 katao mula sa anim na kilometro ng PDZ na kasalukuyang nasa mga evacuation center.
Ayon kay Edna Lou Masicampo, information officer ng Canlaon City, halos nauubos na ang disaster fund ng kanilang LGU, dahil ito ay unang ginamit noong unang eruptions ng Kanlaon noong Hunyo 3.
Samantala, sinabi naman ni Mayor Nicholas Yulo ng Bago City na ang quick response fund ng kanilang lungsod na nagkakahalaga ng P18 milyon ay maaaring magtagal hanggang sa susunod na buwan.
Habang ang ilang mga civil society group ay nagsimula nang magpadala ng tulong sa mga internally displaced persons, hinikayat din ni Gobernador Lacson ang sektor ng pribado na magbigay ng tubig inumin at iba pang mga pangunahing pangangailangan sa mga evacuee.
