Inihain ni House Majority Leader Ferdinand Alexander “Sandro” Marcos ang House Bill 7432 na naglalayong ipatupad ang prinsipyo ng “no work, no pay” sa mga miyembro ng Kongreso.
Ayon sa panukala, ang sahod at benepisyo ng mga kongresista at senador ay magiging nakadepende sa kanilang pagdalo at pakikilahok sa plenaryo, komite, at iba pang opisyal na tungkulin.
Sa ilalim ng panukala, ang hindi maipaliwanag na pagliban ay magreresulta sa pagkawala ng kompensasyon, samantalang ang mga lehitimong dahilan tulad ng karamdaman, opisyal na biyahe, o aprubadong leave ay ituturing na valid na absences.
Inaatasan din ng panukala ang publikasyon ng attendance records upang palakasin ang transparency at pananagutan sa publiko.
Ayon kay Marcos, ang panukala ay naglalayong tugunan ang isyu ng absenteeism at pag-aaksaya ng pondo ng publiko, at hindi ito diskriminasyon laban sa mga mambabatas.
Sinabi rin ng Malacañang na hindi makikialam ang Pangulo sa pagpasa ng panukala, at pag-aaralan lamang niya ito kapag naipasa bilang batas.
