Nakatakdang suspindihin ng Department of Social Welfare and Development (DSWD) ang pag-isyu ng guarantee letters para sa Assistance to Individuals in Crisis Situations (AICS) mula Disyembre 1 hanggang Disyembre 31, 2025 .
Ipinatupad ang hakbang bilang bahagi ng taunang pagsasara ng accounting books ng ahensya upang matiyak na lahat ng bayarin sa service providers ay maisaayos bago pumasok ang 2026.
Nilinaw ng DSWD na normal na proseso ito tuwing katapusan ng taon at hindi nangangahulugan na titigil ang programa.
Sa kabila ng suspensyon, magpapatuloy ang pagbibigay ng outright cash assistance na maaaring umabot hanggang P10,000.
Para naman sa mga nangangailangan ng guarantee letter para sa mga discharge sa Disyembre, papayagan ang pagsusumite ng promissory note upang mailabas ang guarantee letter sa Enero 2026.
Patuloy ding pinalalakas ng DSWD ang kanilang ugnayan sa mga ospital, pharmacies, diagnostic centers at iba pang health institutions upang matiyak ang mabilis at maayos na pagbigay ng tulong medikal sa mga benepisyaryo ng AICS.
