TUGUEGARAO CITY-Ina na nappakilala nga New People’s Army y tallu nga palattuk na pinatay da nga konsehal nga si councilor Angelo Luis na Baggao,Cagayan.
Kinagi ni PSI Ponciano Taliping na PNP Baggao,ta kabalin nga palattugan na NPA y konsehal ay ina da y gloc 30, shotgun anna calibre 22 na biktima.
Ta imbestigasyon na PNP, olu nga nangivu y armado nga grupo ta kapitan na Brngy. Awallan ta balay ni Sanggunian Bayan Member Luis nu anni vinulun paga ira na kapitan.
Pakadde da ta balay na konsehal ay pinalattugan da y karavulu na yaw.
Turi nanaw ira ay ina da y .45 calibre na barangay kapitan.
Ta istorya na atawa na konsehal, kinagi na nga insigida nga nakkarela ta karuba da turi makaginna iyya tu matturunuk nga putuk na palattuk habang maddaggun iyya nga mallutu.
Turi nattallung iyya ta balay da ay nasita na nga naka-camouflage anna armado nga lalaki anna napedda ngana y atawa na.
Nakakalak y pulis ira ta crime scene ta basyu na m16 anna m14.
Neewarak gapa ta unak na balay da y flyers ira nu anni nakatura taw y akkondena da ta revolutionary government nga ikaya ni Presidente Rodrigo Duterte.
Fera taw ay kinondena gapa ni Governor Manuel Mamba y pappapatay da ta konsehal anna nebon na y alistu nga agimbestiga anna meddan y parusa ta sinni man nga NPA nga nangwa ta krimen.
