Ipinahayag ng Malacañang na bukas si Pangulong Ferdinand Marcos Jr. na isapubliko ang kanyang Statement of Assets, Liabilities, and Net Worth (SALN) sa pamamagitan ng tamang proseso na itinakda ng Office of the Ombudsman.
Ayon sa Palasyo, susunod ang Pangulo sa mga patakaran ng Ombudsman hinggil sa paghingi at pagpapalabas ng SALN.
Nilinaw din ng Malacañang na layunin nitong mapanatili ang transparency sa pamahalaan habang pinoprotektahan ang seguridad at kaligtasan ng mga opisyal.
Nauna nang ipinaliwanag ng Executive Secretary na dapat may sinusunod na mga alituntunin sa pagbubunyag ng SALN upang maiwasan ang maling paggamit nito.
Kaugnay nito, nagpulong kamakailan ang Gabinete kung saan nagpahayag ang mga miyembro ng kahandaan na isumite ang kani-kanilang SALN alinsunod sa mga itinakdang regulasyon.
Samantala, ilang mambabatas ang nagpahayag ng pagkadismaya sa posisyon ng Palasyo, at nanawagan ng mas malawak na access sa SALN ng mga opisyal bilang hakbang tungo sa ganap na transparency at pananagutan sa pamahalaan.
Batay sa umiiral na patakaran ng Ombudsman mula pa noong 2020, kinakailangan ang nakasulat at notarized na pahintulot ng opisyal bago maibigay ang kopya ng kanyang SALN sa sinumang humihiling nito.
Sa gitna ng mga imbestigasyon sa umano’y katiwalian sa ilang proyekto ng pamahalaan, naniniwala ang ilang mambabatas na ang pagpapaluwag sa paglabas ng SALN ay makatutulong sa pagsusuri ng yaman ng mga opisyal kumpara sa kanilang sahod at deklaradong kita.
