Umakyat sa quarterfinals ng NCAA Season 102 men’s basketball tournament ang University of Perpetual Help System DALTA matapos talunin ang San Sebastian College-Recoletos, 79-73, sa play-in round nitong Huwebes sa Filoil Centre sa San Juan.
Makakaharap ng ALTAs ang top seed ng Group A na San Beda University sa quarterfinals sa Lunes, kung saan twice-to-beat advantage ang hawak ng Red Lions.
Naging dikdikan ang laro sa fourth quarter matapos makahabol ang Golden Stags at ilang beses na maagaw ang kalamangan. Gayunman, pinangunahan ni Shawn Orgo ang late-game rally ng Perpetual upang masiguro ang panalo.
Nagtala si Jim Corpuz ng 18 puntos para sa ALTAs, pawang mula sa three-point area, habang nagdagdag si Orgo ng 15 puntos.
Nanguna naman si Caesleyh Bacani sa San Sebastian sa naiskor na 20 puntos, ngunit nagtapos ang koponan sa kabuuang 14 talo at walang panalo ngayong season.
