“Walang dapat ikabahala, hindi ito dapat magdulot ng pangamba.”
Ito ang naging pahayag ni Senate President Chiz Escudero nang tanungin siya tungkol sa petisyon na naglalaman ng mga alegasyon hinggil sa mga blangkong item sa bicameral conference committee report ng 2025 national budget.
Isinusumite ang petisyon ni Davao Representative Isidro Ungab at dating Executive Secretary Vic Rodriguez sa Korte Suprema.
Bago ito, inamin ni Marikina 2nd District Rep. Stella Quimbo na may mga blangkong item sa nasabing bicameral conference committee report, ngunit nilinaw niyang ito ay para lamang sa huling pagkalkula ng mga amendment na isinagawa.
Ayon kay Escudero, kung mayroong mga blangkong item, makikinabang naman ang ulat mula sa huling probisyon nito na nagsasabing ang committee on finance at appropriations ay “awtorisado na punan ang anumang kakulangan o nawawalang item” sa iminungkahing budget.
Dagdag pa ng Senate President, hindi ito ang kauna-unahang pagkakataon na ginamit ang ganitong pahayag dahil ito ay matagal nang bahagi ng mga bicameral conference committee report na nilagdaan ng mga nakaraang Kongreso.
