Inanunsyo ng mga piskal sa Utah na kanilang hihilingin ang parusang kamatayan laban kay Tyler Robinson, 22, ang suspek sa pagpatay kay Charlie Kirk, isang kilalang konserbatibong komentarista at lider ng Turning Point USA.
Ayon sa mga dokumentong isinampa, inamin umano ni Robinson sa kanyang kasintahan na siya ang bumaril kay Kirk habang nagsasalita ito sa isang pagtitipon sa Utah Valley University noong nakaraang linggo.
Narekober din sa mga text message ang kanyang mga plano at motibo, kabilang ang pagbanggit na sawa na siya sa poot ni Kirk.
Nahaharap si Robinson sa pitong kaso kabilang ang aggravated murder, obstruction of justice, at witness tampering matapos subukang ipatago ang ebidensya at hilinging burahin ang mga mensahe na nag-uugnay sa kanya sa krimen.
Dagdag pa ng mga awtoridad, natunton sa DNA ni Robinson ang baril na ginamit sa pamamaril.
Siya ay sumuko matapos harapin ng kanyang mga magulang at kumbinsihin ng isang kaibigang retiradong pulis.
Si Kirk, 31, ay malapit na kaalyado ni dating Pangulong Donald Trump at isa sa pangunahing boses ng konserbatibong kilusan sa mga kabataan.
Ang kanyang pagkamatay ay muling nagpasiklab ng pangamba sa tumitinding karahasan sa politika sa Estados Unidos.
