Patuloy na tumataas ang presyo ng langis sa pagbubukas ng merkado noong Linggo bunsod ng digmaan sa Middle East
Ilang sandali matapos magbukas ang Chicago Mercantile Exchange, umakyat ng 2.54 porsiyento ang US benchmark na West Texas Intermediate (WTI) sa $100.22 kada bariles.
Samantala, ang Brent crude, na itinuturing na international benchmark, ay tumaas ng 2.88 porsiyento sa $106.11 kada bariles.
Mas mababa ito kumpara sa matitinding pagtaas ng presyo na naitala sa mga nakaraang sesyon ng kalakalan sa loob ng dalawang linggo.
Ayon sa mga ulat, pumalo na sa 40 hanggang 50 porsiyento ang itinaas ng benchmark oil prices mula nang magsimula ang pag-atake ng United States at Israel sa Iran noong Pebrero 28.
Pinangangambahan na maaari itong makapagpabagal sa paglago ng ekonomiya at magpalala ng inflation.
Dagdag pa rito, binawasan ng ilang estado sa Gulf ang kanilang produksyon ng langis habang may mga oil tanker na naipit sa rehiyon.
Nanatili ring halos sarado ang Strait of Hormuz — isang mahalagang rutang dinaraanan ng humigit-kumulang 20 porsiyento ng pandaigdigang export ng langis at gas.
Sinabi naman ni US Energy Secretary Chris Wright na ang pagsasara ng nasabing ruta ay magdudulot lamang ng “short-term pain” o panandaliang pagtaas ng presyo.
Ayon sa kanya, posibleng matapos ang digmaan sa loob ng susunod na ilang linggo.
Nagbabala rin ang International Energy Agency na ang digmaan sa Middle East ay maaaring magdulot ng pinakamalaking pagkaantala sa suplay sa kasaysayan ng pandaigdigang merkado ng langis.
Samantala, nakaapekto rin sa suplay ang mga pag-atake ng Estados Unidos at Israel sa mga target sa Iran, kabilang ang oil export hub sa Kharg Island.
