Nahuli ang lider ng isang gang matapos na pagnakawan ang isang tindahan ng bigas sa Bocaue, Bulacan kamakailan.
Natuklasan na ang suspek ay isang pulis sa Batangas.
Batay sa kuha na CCTV footage, makikita ang limang armadong lalaki na na pawang nakasuot ng bonnet na pumasok sa tindahan noong Sabado.
Iginapos nila ang mga tao sa tindahan ng bigas at saka kinuha ang mga pera at mga gamit.
Ayon kay Police Regional Office 3 director Police Brig.Gen. Ponce Rogelio Peñones, ang modus ng gang ay papasok sila sa isang bahay o establisimento at itatali ang mga biktima, at kinukuha ang mga puwede nilang makuha na kanilang mapapakinabangan.
Nitong Miyerkules, isang soft drinks warehouse naman ang inatake ng grupo at doon nakilala sa CCTV footage ang isa sa mga suspek nang bahagyang bumaba ang kaniyang face mask at makita ang kaniyang mukha.
Nag-imbestiga ang mga pulis hanggang sa matukoy nila ang lalaki at naaresto na isa palang pulis na si Police Staff Sergeant Miguel Andrew Oñate, 34-anyos, at nakatalaga sa Tanuan Police sa Batangas.
Nakuha mula sa suspek ang isang baril na kalibre .45, mga bala, isang pekeng baril, bolt cutter, mga cellphone, plaka ng sasakyan, at mga barya na kinuha mula sa soft drinks warehouse.
Positibong kinilala ng mga biktima ang pulis na suspek na nanloob sa kanila.
Sinabi ni Peñones, kapag day-off ng pulis ay gumagawa siya ng pangho-hold-up kasama ang kanyang grupo.
Sinabi pa niya nirerentahan ng suspek sa Laguna ang sasakyan na ginagamit nila sa panghoholdap.
Inamin umano nito na tatlo na ang kanilang nabiktima.
