TUGUEGARAO CITY – Boluntaryo nga nagali y karwan nga residente ta duwa nga barangay ta ili na Kasibu, Nueva Vizcaya ta maganassing ira nga baka madamay ira ta engkwentro na militar anna New People’s Army.
Ta impormasyon na Bombo Radyo Tuguegarao, 20 familya nga katumbas na 90 indibidwal nga residente na Upper Bilongay, Brgy. Paket y nagali kasabay na engkwentro na militar anna rebelde ta Upper Maglan, Brgy. Dine nga nepatay na appa nga suddalu turi Biyernes.
Nagali gapa ta munisipyo na Kasibu y ari paga mamwan nga bilang na residente na pitu nga Sitio na Brgy. Pao megafu ta maganassing ira ta engkwetro na militar anna rebelde ta kabalin na engkwntro na duwa nga grupo.
Kiniddaw gapa na barangay opisyal na Pao ta nakagi nga munisipalidad nga iyali da labbi y maturu ta 1,000 residente tari tapenu ari madamay ta gulu.
Namwan nga tuluy laman y hot pursuit operation na militar ta NPA nga naka-engkwentro.
Fera taw ay dismayado gapa y karwan nga residente ta kapulisan megafu ta ari da insigida nga inaksiyunan y impormasyon asunto ta pagangwa da ta meeting na armed men ta lugar da turi Hunyo anna Hulyo.
