Tiniyak ni Senate President Vicente “Tito” Sotto III na agad kikilos ang Senado sakaling may impeachment complaints laban kay Pangulong Ferdinand Marcos Jr. at Bise Presidente Sara Duterte.
Ayon sa Saligang Batas, eksklusibong kapangyarihan ng Kamara ang magpasimula ng impeachment. Kapag na-impeach na ang opisyal, tanging Senado ang may kapangyarihang maglitis at magpasya kung guilty o hindi.
Wala pang opisyal na impeachment case na naisampa laban kay Marcos sa Kamara. Isa sa posibleng batayan ay ang umano’y pagtataksil sa tiwala ng publiko kaugnay ng pambansang badyet.
Samantala, matatapos na ang one-year ban sa muling pagsampa ng impeachment laban kay Duterte sa Pebrero 6, 2026. May grupo na nakatakdang magsampa ng panibagong reklamo laban sa bise presidente.
Noong nakaraang taon, hinikayat ni Marcos ang mga kakampi na huwag magsampa ng impeachment laban kay Duterte, ngunit kamakailan sinabi ng Malacañang na hindi pipigilan ang pagsunod sa proseso para panagutin ang may sala.
Ayon sa ilang mambabatas, may batayan din para sa impeachment ng Pangulo kaugnay ng umano’y pag-abuso sa unprogrammed appropriations at alegasyon ng kickback na kinasasangkutan ang gabinete.
