Makulimlim at may mga pag-ulan pa rin sa hilagang bahagi ng bansa dahil sa amihan at shear line at sa gitna at katimugang bahagi dahil sa ITCZ. Inaasahang magpapatuloy ang ganitong sitwasyon hanggang sa susunod na linggo.
Ang 𝗜𝗡𝗧𝗘𝗥𝗧𝗥𝗢𝗣𝗜𝗖𝗔𝗟 𝗖𝗢𝗡𝗩𝗘𝗥𝗚𝗘𝗡𝗖𝗘 𝗭𝗢𝗡𝗘 (𝗜𝗧𝗖𝗭)) o pagsasalubong ng hangin mula sa northern at southern hemisphere ay nakakaapekto muli sa katimugang bahagi ng bansa.
Makulimlim na papawirin na may pabugsu-bugsong mahihina hanggang sa malalakas na mga pag-ulan sa Visayas, Caraga, Davao Region, Zamboanga Peninsula, Bicol Region, at MIMAROPA. Posible ring maapektuhan ang mga karatig na lugar.
Ang nalalabing bahagi ng Mindanao ay makakaranas ng halos maulap hanggang sa makulimlim na papawirin at paminsan-minsang mga pag-ulan na inaasahang huhupa na sa mga susunod na oras.
Ang 𝗦𝗛𝗘𝗔𝗥 𝗟𝗜𝗡𝗘 o lugar kung saan nagtatagpo ang malamig na amihan at ang easterlies ang nagpapaulan sa hilagang silangang bahagi ng Luzon.
Makulimlim na papawirin na may pabugsu-bugsong mahihina hanggang sa minsang matitinding mga pag-ulan ang inaasahan sa mainland Cagayan, Apayao, Isabela, Aurora, at Quezon. Posible ring maapektuhan ang mga karatig na lugar.
Ang malamig na 𝗔𝗠𝗜𝗛𝗔𝗡 (𝗡𝗢𝗥𝗧𝗛𝗘𝗔𝗦𝗧 𝗠𝗢𝗡𝗦𝗢𝗢𝗡) ay bahagyang humina at nakakaapekto na lamang sa Northern Luzon.
Inaasahang muling lalakas ang amihan sa mga susunod na araw at makakaapekto sa halos buong Luzon.
Makulimlim, mahangin, at may mahihina hanggang sa minsang katamtamang mga pag-ulan sa Batanes at Babuyan Islands.
Ang nalalabing bahagi ng Luzon, kasama ang Metro Manila, ay makakaranas ng halos maulap hanggang sa makulimlim na papawirin at paminsan-minsang mga pag-ulan.
𝗪𝗮𝗹𝗮𝗻𝗴 𝗻𝗮𝗸𝗶𝗸𝗶𝘁𝗮𝗻𝗴 𝗽𝗮𝗻𝗶𝗯𝗮𝗴𝗼𝗻𝗴 𝗯𝗮𝗴𝘆𝗼 na posibleng direktang makaapekto sa bansa hanggang sa katapusan ng 2024.
