TUGUEGARAO CITY-Tallu nga tolay y natay ta kassik na kitu o rabies sangaw nga ragun taw ta Probinsya na Cagayan.
Yaw ay kinumfirma ta Bombo Radyo ni Shamon De Yro, Coordinator na Provincial Animal Bite Treatment Center nu anni y natay nga pasyente ay pare parehu nga residente ta ili na Rizal.
Base ta datos, tadday nga lola y nakassik na kitu y natay turi vulan na Hunyo, tinunuk gapa yaw na lalaki nga nappulutan ta kiru nga igga rabies na anna natay turi Oktubre anna tadday nga 56-anyos nga babay nga natay turi vulan na Nobyembre.
Megafu taw ay inapiddu da y kampanya kontra rabies ta ili na Rizal.
Ta nakassik ira ta kitu ay kinajanan ni De Yro nga insigida nga pakarenwan da ta narenu nga danum anna savunan da y partes na baggi da nga nakassik na kitu lima adde mafulu nga minutos liye da nga iyangay ta Animal Bite Treatment Center tapenu meddennan ira ta libre nga bakuna.
