Hindi dadalo si Vice Presidente Sara Duterte sa susunod na pagdinig ng House Committee on Justice kaugnay ng mga reklamong impeachment laban sa kanya sa Abril 29.
Kinumpirma ito ni Atty. Michael Poa, tagapagsalita ng kampo ng bise presidente. Ito na ang ikatlong pagkakataon na hindi dadalo si Duterte sa pagdinig ng komite.
Sa Abril 29, inaasahang tatalakayin ng komite ang mga alegasyon laban kay Duterte, kabilang ang umano’y pagbabanta kina Pangulong Ferdinand Marcos Jr., Unang Ginang Liza Araneta-Marcos, at dating House Speaker Martin Romualdez.
Ayon kay Poa, mananatili ang kanilang desisyon na hindi dumalo sa mga pagdinig ng Kamara. Aniya, naghain na rin sila ng petisyon sa Korte Suprema para ipatigil ang proseso ng impeachment.
Dagdag pa ni Poa, sasagutin lamang ni Duterte ang mga paratang laban sa kanya sa tamang lugar, na aniya ay sa Senado kung matutuloy ang impeachment trial.
Sa nakaraang pagdinig, sinuri ng 39 miyembro ng komite ang mga financial record ni Duterte. Ayon sa Anti-Money Laundering Council, may nakita itong ilang kahina-hinalang transaksyon na may kaugnayan sa bise presidente at sa kanyang mga kamag-anak.
Nauna nang itinanggi ni Duterte ang alegasyon na may bilyon-bilyong pisong pumasok sa kanyang bank account at iginiit na malinis ang kanyang rekord sa serbisyo publiko.
