Nahuli ng Philippine National Police – Anti-Cybercrime Group (PNP – ACG) sa isinagawang entrapment operation ang dalawang babaeng magkapatid na iligal na nagbebenta ng rehistradong SIM card online sa Bacoor City, Cavite.
Sa panayam kay ACG acting Director PBGen. Wilson C. Asueta, sinabi nya na ang modus ng mga suspek ay bumibili ang mga ito ng mga SIM card sa isang hindi pinangalanang supplier kung saan ito ay kanilang ire-register at gagamitin para gumawa ng account sa mga online shopping platforms at online gaming applications.
Kasunod nito ay kukunin nila ang mga vouchers at ang P100 na new-member reward kung saan ika-cash -out nila ito sa pamamagitan ng e-wallet at ibebenta muli bago ito mag-expire sa halagang P21 mula sa P25 na orihinal na bentahan nito.
Ayon pa kay ACG acting Director Asueta, ang mga registered SIM na mabibili online ay maaring magamit sa online scamming at sa iba pang ilegal na aktibidad .
Kaugnay nito, nakumpiska sa nasabing operasyon ang 610 na mga rehistradong SIM card .
Samantala, nahaharap naman ang dalawang suspek sa kasong paglabag sa RA 11934 o SIM Registration Act of 2022 na may pyansang P100,000 hanggang P300,000 at may anim na buwan hanggang anim na taong pagkakakulong.
Nagpaalala naman ang ACG acting Director sa mga bibili ng SIM card na dapat bumili sa mga lehitimong bilihan, iobserve ang tamang registration, at huwag ipahiram o ibenta dahil ito ay may karampatang parusa.
